أهم حاجة في جمالك إنك تكوني واثقة في نفسك، ويا سلام بقى لو تزودي ثقتك في نفْسِك بأن ريحة نفَسِك تكون عطرة ومنعشة.
ودلوقتي بقى هقول لك على الحاجات اللي بتخلي ريحة النفَس مش لطيفة....
التدخين
التدخين ده أول حاجة بتخلي ريحة النفَس مش حلوة، وكمان بتصفر السنان.
التوابل والبصل والثوم
كمان التوابل الزيادة في الأكل، والبصل والثوم بتخلي ريحة النفَس مش لطيفة، وكمان بتزود البقع في السنان.
القهوة والحلويات
شرب القهوة وتناول الحلويات بكميات كبيرة بيرفع من درجة حموضة الفم والمعدة، وده بيسبب تسوس الأسنان وبيعمل ريحة مش حلوة.
اللسان
لو كنتي بتشمي ريحة مش حلوة من لسانك، وعلشان تتأكدي إن ريحة النفَس الكريهة من اللسان يبقى ممكن تعملي الاختبار ده، وهو إنك تبصي على لسانِك في المرايا ولو لقيتي لسانِك عليه طبقة بيضاء يبقى فيه بكتيريا عليه، أو ممكن يكون فيه مشاكل في المعدة أو التهابات في اللثة ولازم تستشيري دكتور.
جفاف الفم
جفاف الفم وعدم ترطيبه من الحاجات اللي بتسبب الرائحة الكريهة للفم.
تسوس الأسنان
تسوس الأسنان والتهابات اللثة من أكتر الحاجات اللي بتعمل ريحة مش لطيفة للفم.
الأسنان الصناعية
لو كنتي مركبة أسنان صناعية أو تاج أو طربوش لازم تفحصيها عند الدكتورة باستمرار علشان لو مش متثبتة كويس ممكن الأكل يدخل تحتها ويعمل ريحة مش لطيفة.
ودي شوية نصائح علشان تحافظي على رائحة نفَس منعشة...
اغسلي أسنانك
لازم تنظفي أسنانك مرتين في اليوم على الأقل؛ وخاصة قبل النوم، وياريت تستخدمي "غرغرة" أو "غسول الفم" بعد كل وجبة، وخصوصاً اللي فيها سمك أو لبن أو توابل كتيرة.
الخيط الطبي
استخدمي الخيط الطبي بتاع الأسنان كل يوم الصبح أو بالليل قبل ما تنامي.
اشربي ميه
لازم تشربي على الأقل 8 أكواب ميه في اليوم علشان ترطبي الفم وتحميه من الجفاف.
اعملي زيارة لدكتور الأسنان
لازم تعملي تنظيف لأسنانك عند دكتور الأسنان مرتين على الأقل في السنة.
كلي خضار وفاكهة
اهتمي بأكل الخضروات والفاكهة الطازجة زي الجزر والتفاح وكمان الكرفس اللي أجدادنا كانوا بيستخدموه زمان.
النعناع واللبن
اشربي كل يوم كوب لبن أو نعناع مغلي، وأي حاجة فيها فيتامين سي لأن الحاجات دي كلها بتقوي مناعة الجسم، وبتقضي على البكتريا
★منتدى الـدلــ عة ـــو
موضوع: ثقتك في نفْسِك .. من ريحة نفَسِك 
الثلاثاء أغسطس 11, 2009 5:23 pm
